Muqdisho (Wararka)— Sheekh Maxamed Shaakir Cali Xasan, oo hore u soo noqday Madaxii Xukuumadda Galmudug isla markaana ka mid ah hoggaamiyaasha Ahlu Sunna Waljamaaca, ayaa maanta magaalada Muqdisho kaga dhawaaqay urur siyaasadeed cusub oo la magac baxay Urur Siyaasadeedka Dib-u-heshiisiinta iyo Horumarka ee TOWFIIQ.

Ururkan cusub ayaa noqday mid kamid ah xisbiyada iyo ururrada siyaasadeed ee dalka ka jira, kuwaas oo ku baratami doona doorashooyinka soo socda. Ahlu Sunna Waljamaaca oo door muuqda ku lahayd siyaasadda Galmudug iyo guud ahaan dalka, ayaa hadda si rasmi ah uga mid noqonaysa nidaamka xisbiyada badan ee Soomaaliya.

Sheekh Maxamed Shaakir ayaa ka hadlay muhiimada ururkan, isagoo xusay in TOWFIIQ uu diiradda saari doono dib-u-heshiisiinta, horumarka, iyo midnimada shacabka, si loo helo xasillooni siyaasadeed iyo horumar ballaaran.

Ururkan ayaa kusoo aadaya xilli ay Soomaaliya isu diyaarineyso tartanka xisbiyada badan, iyadoo siyaasiyiinta iyo kooxaha kala duwan ay dadaal ugu jiraan in ay saameyn ku yeeshaan doorashooyinka dalka.

Waxaa la filayaa in maalmaha soo socda uu ururkan faahfaahin dheeraad ah ka bixiyo ajendayaashiisa siyaasadeed iyo qorshayaashiisa mustaqbalka.