Madaxweynaha Soomaaliya, Xasan Sheekh Maxamuud, ayaa maanta dib ugu laabtay furimaha dagaalka kadib markii uu shalay Muqdisho kula kulmay Wasiiru Dowlaha Arrimaha Dibadda ee Imaaraatka Carabta. Madaxweynaha ayaa gaaray degmada Cadale ee gobolka Shabeellaha Dhexe, oo ah deegaan xeebeed muhiim ah oo ku dhow furimaha dagaalka ay dowladda kula jirto kooxda Al-Shabaab.

Safarka Madaxweynaha waxaa fududeeyey mid ka mid ah diyaaradaha ay dhawaan heshay Soomaaliya, taasoo qeyb ka ah dadaallada lagu xoojinayo awoodda ciidan ee dalka. Waxaa la filayaa in Madaxweynaha uu halkaas ka sii wado abaabulka iyo dhiirrigelinta ciidanka si loo xoojiyo dagaalka ka dhanka ah Al-Shabaab.

Madaxweyne Xasan Sheekh Maxamuud ayaa horey u booqday deegaano muhiim ah sida Xarardheere iyo Ceeldheer bishii Abriil 2024, si uu u dardargeliyo howlgallada dib u xoreynta dalka iyo inuu dhiirrigeliyo Ciidamada Qalabka Sida iyo halyeeyada difaaca shacabka ee la dagaallamaya Khawaarijta.

Sidoo kale, bishii Sebtembar 2023, Madaxweynaha ayaa booqday degmada Aadan-Yabaal ee gobolka Shabeellaha Dhexe, halkaas oo uu kormeer ku sameeyey xeryaha ciidamada xoogga dalka iyo kuwa deegaanka ee ku howlan dib u xoreynta dalka.

Dadaalladan isdaba joogga ah ee Madaxweynaha ayaa muujinaya sida ay uga go’an tahay xoreynta dalka iyo xasilinta deegaannada laga saaray kooxda Al-Shabaab.