Madaxweynaha maamulka Hirshabeelle Cali Cabdullaahi Xuseen Guudlaawe ayaa si adag u cambaareeyay weerarkii argagaxa lahaa ee Shalay lagu dilay askar ka tirsaneyd ciidanka xoogga dalka ee ka dhacay aaga deegaanka Ceel baraf ee gobolka Shabeellaha Dhexe.

Madaxweyne Cali Guudlaawe oo ugu horeyn ka tacsiyadeeyay geerida askarta sida arxan darada ahaa loo dilay, isagoona amray ciidamada amaanka maamulka Hirshabeelle in 24 saac gudahood sharciga ku horkeenaan ragii ka dambeeyay weerarkaas.

“Waa fal ka fog Shareecada Islaamka, dhaqanka suubban ee Soomaaliyeed iyo Xuquuqda Aadanaha. waxaan farayaa laamaha amniga 24-saac gudahood in sharciga la horkeeno cid walba oo ku lug yeelato dhacdadii aragagaxa laheyd ee ka dhacday deegaan ku dhow degmada Ceelbaraf” ayuu lagu yiri qoraal kasoo baxay Madaxtooyada Hirshabeelle.

Ugu dambeyntii Madaxweynaha Hirshabeelle ayaa ugu baaqay shacabka Hirshabeelle iney ka fogaadaan dhacdo kasto oo wax u dhimayso amniga iyo wadajirka bulshada ku nool deegaanada Hirshabeelle.

Warkaan kasoo baxay madaxtooyada Hirshabeelle ayaa kusoo aadaya, iyadoo wali Taliska Ciidanka Xoogga dalka Soomaaliyeed uusan ka hadlin falka Shalay lagu laayay askar ka tirsaneyd ciidanka xoogga dalka ee la dilay, iyagoo kusii jeeday guryahooda, si ay farxad ula soo qaataan qoysaskooda oo waqti dheer ay ka maqnayeen si fasaxooda uga faa’ideystaan.