Ugu yaraan hal askari oo ka tirsan ciidamada Puntland ayaa ku dhintay, sagaal kalena waa ay ku dhaawacmeen kaddib weerar ay xalay kooxda Daacish kusoo qaadday deegaanka Xabley ee degmada Ufayn ee gobolka Bari.


Weerarkan oo si gaar ah uga dhacay deegaanka Dhaban-qooxle ee buuraha Xabley, ayaa bilaabmay kadib markii maleeshiyaad ka tirsan firxadka kooxda Daacish ay weerareen saldhig ay ku sugnaayeen cutubyo ka tirsan ciidamada Puntland.

Ciidamada Puntland ayaa lasoo wariyay inay iska caabiyeen weerarkan, iyagoo dagaalka ku dilay xubno ka tirsan Daacish, lamase oga tiradooda.

Wararka hordhaca ah ayaa sheegaya in iska horimaadku uu socday ilaa saaka waaberigii.

Maalmihii ugu dambeeyay, ciidamada Puntland ayaa la kulmayay weeraro ku dhufo ah oo kaga imaanayay kooxda Daacish, kuwaas oo weli ku dhuumaalaysanaya buuraha Calmiskaad.

Maalin ka hor, qaraxyo miino ayay Daacish la eegteen gaari kuwa gargaarka degdega iyo mid kaloo ay wateen ciidamada Puntland, iyadoo halkaasi ay ka dhalatay khasaare dhimasho iyo dhaawac leh.

Madaxweyne Deni ayaa dhawaan ku dhawaaqay wajiga saddexaad ee howlgalka lagusoo afjarayo kooxda Daacish. Weli ciidamadu kuma guulaysan inay gaaraan meelaha ay Daacish isku urursadeen.